In meert 2014 kreeg ik veur mien bundel Veenbraand de Streektaolpries (2013) van het Dagblad van het Noorden. Geweldig wies was ik daormet, achternao wel het miest umdat mien olders dit nog beleefd hebt. 't Is veural deur heur da'k mij gung interesseren veur het Drèents, wat niet bepaold veur de haand lig aj geboren bint in Zeeland en opgruid in Zuud-Holland. Gelukkig bleven mam en pap ok in 't westen van het laand geregeld Drèents praoten met mekaor. De taol was mij daordeur vertrouwd.
Nog gien maond nao de oetreiking van de pries in 2014 kwam mien pap oet de tied en mien mam een klein half jaor laoter. Ik weet zeker dat ze het geweldig mooi vunden hadden da'k nou ok met mien neie dichtbundel Vioolties an zee nomineerd bin veur de Streektaolpries.
Indirect bint ze der wel degelijk bij, want het eerste diel van dizze bundel, Kört bij de raand, is opdraogen an heur beiden en elke keer as ik die gedichten lees of veurlees, komt ze in elk geval veur mijzölf weer tot leven. Dat dat in heur eigen taol gebeurt, is feitelijk an heurzölf te daanken.
Zundag 14 april wordt de Streektaolpriezen oetreikt. Meer informaotie daorover stiet hier.
