Op 1 december j.l. was de officiële prissentaotie van "Blaauwe Dreum", schrieverskronkels over de Drentsche Aa. Leden van de Drentse Schrieverskring vunden inspiraotie in het prachtige gebied waor de beek met al zien lopies deurhen stroomt.
Het gedicht wa'k veur de bundel schreef is 'Bij het Zwaonemeer'. Hierveur leut ik mij inspireren deur het landschap in de umgeving van Gieten en deur de naomen Zwanemeer en Zwanemeerbos. In dat bos bint 26 grafheuvels. Beide ligt even ten noorden van Gieten. Eerder he'k in dit blog verteld over mien bezundere relaotie met de zwaon, in 't bezunder in verbaand met de leste levensfase en het oet de tied kommen van mien olders. Sunt die tied hef de zwaon symbolische weerde veur mij.
Toen ik zundagmörgen op Facebook keek, zag ik een bericht van organist Wim Boer, die der op wees dat hij speulen zul tiedens de karkdienst in Oring en dat die dienst live te volgen was. Ik was wel beneid en zag even laoter dat Helene Westerik de veurganger was.
Het bleek een veur mij wat emotionele dienst te wezen. Helene Westerik leidde destieds de ofscheidsbijienkomst van zowel pap as mam. De meziek die vandaog in de dienst te heuren was deu mij daor an dèenken. Bij het ofscheid van mam klunk under meer de 'Dans van de zalige geesten' van Gluck, wat veur die gelegenheid 'Dans van de gelukkige geesten' nuumd weur. Pap was vief maond eerder oet de tied kommen en nou waren ze weer saomen. Wieder weur in de dienst van vandaog een lied zungen op meziek van Sibelius, oet zien Finlandia symfonie, precies het diel waor mien pap zo van heul.
Het leek wel regisseerd van boven, zo alles bij mekaor. De veurganger, de meziek in de dienst, de bijienkomst in Assen, waor ik het gedicht met de zwaonen zul gaon veurlezen. En boetendes de organist, die mien olders ok kend hef.
Toen ze nog leefden waren mien olders trouwe bezukers, a'k argens gung optreden. En ik kun der zeker van wezen dat ze mij van teveuren belden um mij succes te wensen. Vandaog har ik stark het gevuul dat ze der bij waren in Assen. En da's een mooie gedachte.
(De foto's bint van André Brasse)
