'Ik bin hellig' schreef ik een jaor of wat leden. Vandaog las ik 't nog ies weer en het past - jammer genog - aal nog in dizze daogen, waorin zoveul mama's en kinder op de vlucht bint veur oorlog en geweld.
Ik bin hellig
Ik bin hellig op mien mama
want ik wol een neie pop
en de slik die ik pas kreeg
is allemaol ok alweer op
Maor mien mam zee (stel je veur):
je heb het hierzo veuls te goed
’t kan gien kwaod daj ok ies even
een klein toertien wachten moet.
Alle barbies die’k nou heb
kleed ik al twee maond oet en an
zeg nou zölf, daor wor je op den duur
toch knap vervelend van
Over dree maond pas bin’k jaorig
dan krieg ik pas weer kedoos
dree maond, da’s wel dartien week nog
ach, wat duurt dat nog een poos!
Dan dèenk ik zomaor iniens
an ’t neie wichtien in de klas
ze komp oet een aander laand
waor het veur heur gevaorlijk was
Met heur mama en heur breurtien
is ze vlucht oet dat gebied
en ze möt er aal an dèenken
hoe of ’t met heur papa giet.
Al heur speulgoed is daor bleven
want dat kun zo gauw niet met
dus nou zit heur liefste knuffel
daor wied vot allèn op bed
’t Was een pop van olde lappen
die ze kreeg van een vriendin
al heur dreumen en gedachten
stopte zij daor ’s aovends in.
Smangs zit ze zo stil te kieken
en dan wordt heur ogen rood
maor ze wil op schoel niet reren
want daorveur is ze te groot
Op het jeugdjournaol
zie ik bij tieden wat ze mist
en begriep ik een klein beetien
hoe slim echte oorlog is.
Ik zie al mien knuffels zitten
en dan nim ik een besluut
van de paor die ik het liefst vin
zuuk ik ientie veur heur uut
As wij mörgen dan bij schoel komt
fluuster ik vlak veur de deur:
je hebt aaid hiel goed op mij past
pas nou maor hiel goed op heur!
© Suze Sanders
