Vanmörgen he'k optreden tiedens Taal an Taofel in Vries. Gerard Stout las ok veur oet zien wark en duo HáDieJan (Dianne Marsman en Jan Ottink) oet de Achterhoek verzörgde de meziek: mooie luusterliedties. Het was een mooie bijienkomst met veul en andachtig volk. Janny Roggen, Herma Stroetinga en Anne Doornbos deuden 't meraokel. Techniek en eten was ok dik veur mekaor.
Speciaol, veur mij in 't bezunder, was het leste nummer dat HáDieJan zung: As ik verdwaaln. Jan Ottink vertelde dat hij jaoren leden mien gedicht En komp de dag las en dat gedicht was ien van de inspiraotiebronnen veur het lied dat hij schreef en waormet ze vandaog dus ofsleuten.
Ik vin 't bezunder dat En komp de dag op zoveul verschillende manieren een plek kregen hef, naoda'k het schreef as 'Gedicht van de maond' veur het project van wat toen nog 'Drentse Taol' was. Maondblad Drenthe en Radio Drenthe waren in die tied ok betrökken bij dat project.
Daornao hef Ab Drijver En komp de dag op meziek zet, het Nedersaksisch Vocaal Ensemble hef het in het repertoire opnummen, Carlos Micháns hef het as ien van mien Drèei Drentse Gedichten gebroekt in de symfonische compositie veur het Drents Symfonieorkest, laoter ok oetvoerd (in Spanje!) deur het Grootkoor en orkest van Bragi oet Grunning en Luc Oostra hef er een fado-oetvoering van opnummen. En de tekst is dan dus ok inspirerend west veur Jan Ottink.
Het is mooi veur mij, as dichter, dat zoveul mèensken die tekst kennelijk op pries stelt.
Naoda'k het gedicht een maol veurlezen har, kwam een vrouw van een jaor of tachtig wat ontdaon naor mij toe en vreug: hoe kun jij nou weten dat ik dat zo vuul.
Lichtkaans zit het daorin.
Het nummer As ik verdwaaln van HáDieJan, waordeur dit verhaoltie in gang zet weur, kuj hier heuren. Het komp oet heur theatershow 'Teegnkommn' oet 2007.
Geen opmerkingen:
Een reactie posten