Gedichtendag, thema Muziek

Lied van de rivier

An stieve stengels blös de wind meziek
unzichtbaor schreeuwen hangt boven het waoter
in regentakt stroomt de rivier naor laoter
gekromde stokken priemt vanaof de diek

staccato spiekert snaovels 't waoter in
en angeliende dood giet stiller jaogen
op harten die gien weet hebt van de daogen
under het spiegelvlak verroert gien vin

zaacht happend ligt de monden an het pad
in kolde ogen valt het leste locht
een spiegel is gien keerpunt veur de dood

het lied van de rivier klinkt vrömd en groot
verrötting dref op golven naor de stad
een groet, as in een leste aosemtocht.


Laoter

Het lied van de rivier klinkt vrömd en groot
een bruggewelf umspant het met zien kracht
golven trekt rimpels in de gladde nacht
en tonen siddert in de diepe schoot

an stugge strengen langs de wallekaant
de schepen in heur dreumen stil verzunken
heur longern lig an ankers diep verklunken
maor onrust woelt in 't lösgetrilde zaand

verdoemd het laand waor dreumen niet bestaot
waor de rivier nooit weer de zee mag vinden
waor vogels fladdert met gekörte vleugels

de vrijheidsdrang is wars van alle teugels
de klaanken van heur lied laot zuk niet binden
ze vindt het diepste dal de stilste straot.

© Suze Sanders

Oet As langs de muren d'aovend slöp (1992)

17 meert Taal an Taofel Vries

Op zundag 17 meert vervang ik Hans Jalvingh en Herma Stroetinga (Dichters uut de tied) bij Taal an Taofel in Café 'Onder de Linden' in Vries. Ik gao dan veural veurlezen oet mien neie bundel 'Veenbraand', die op 8 meert verschienen zal.

Gerard Stout verzörgt het prozagedielte en HáDieJan! zörgt veur de meziek.
Het programma (inclusief warm eten) duurt van 11.00 tot 14.00 uur.
Kaorten kuj reserveren bij Café 'Onder de Linden', info@onderdelindenvries.nl of tillefonisch via 0592 541224.

Dizze Wals deur Heeren Oud-Zuid

Het muzikaole trio Heeren Oud-Zuid, bestaonde oet Luc Oostra, Jan Kuipers en Cor Többen, hef op 16 december j.l. veur het eerst 'Dizze Wals' heuren laoten in De Amer, tiedens heur optreden in het veurprogramma van Frédérique Spigt.
Het nummer is oorspronkelijk van Leonard Cohen ('Take This Waltz'), die het op zien beurt weer bewarkte. Het origineel is nl. een gedicht van Lorca: 'Kleine Weense Wals' en ik vertaolde het nummer veur Heeren Oud-Zuid naor het Drèents.

Zundag 27 jannewaori in Börk

Zundag 27 jannewaori lees ik veur in museumherberg De Ar in Westerbörk, tiedens een literaire/muzikaole mörgen. Bas Luinge, Gea Tiemens en Gezinus Omvlee bint ok van de partij.
De meziek wordt verzörgd deur Trijntje van der Scheer en Gerrie Vos.
De organisaotie is in haanden van Stichting Zummeractiviteiten Westerbörk.
Meer informaotie vinj hier.