Draogers van twiefellocht is prissenteerd

Vrijdagmiddag 31 jannewaori zat het hielemaol vol bij de prissentaotie van Draogers van twiefellocht. Wat fijn dat zoveul mèensken de muite namen en sommigen zölfs een paor uur in de auto zaten um der bij te wezen. 

Cor Többen, Luc Oostra en Jan Kuipers van Heeren Oud-Zuid verzörgden de meziek dizze middag en ok al tiedens de inloop. Naodat alle stoelen vuld waren, vertelde oetgever Bert Rossing ien en aander over Het Drentse Boek en wat der zoal in het Huus van de Taol oetstukt wordt.

     

In de loop van dat praotie weur Anne-Marie Boelens-Tomassen deur Bert hen veuren vraogd. Zij leverde de prachtige holtsnede die op de veurkaant van mien bundel stiet. As basis daorveur diende een foto die ik meuk, maor die niet scharp genog was um te gebroeken as umslag. Ik bin slim wies met dit ontwarp van Anne-Marie, nog wel net zo mooi as die foto van mij. Tot mien grote verrassing kreeg ik het origineel inliest anbeuden! 

Nao de inleiding van Bert Rossing was het trio Heeren Oud-Zuid weer te heuren. Zij hebt in de ofgelopen jaoren diverse van mien gedichten op meziek zet. Eerst weur En komp de dag oetvoerd en daornao Winternacht. Ik bin altied weer tröffen deur die muzikaole versies van mien gedichten. 

As auteur was 't vervolgens mien beurt um ien en aander te vertellen over mien zeuvende dichtbundel. Allemaol bint ze oetgeven deur Het Drentse Boek en Draogers van twiefellocht is weer hielemaol in 't Drèents schreven. Het leek mij een mooi idee um het eerste exemplaor te geven an Henk Nijkeuter. Gelukkig was Henk bereid um dat in ontvangst te nimmen en niet allen dat, hij har ok nog een prachtig dankwoord veur mij over de bundel. 

          

                 

Heeren Oud-Zuid leut vervolgens heur versie van mien gedichten Glazen bol en Nachtvlinder heuren. 

Nao een gesprek dat Bert met mij har over under meer de taol van de Māori, die een rol speult in mien neie bundel, weur het tied um wat gedichten te laoten heuren. Hierunder lees ik het titelgedicht 'Draogers van twiefellocht'.

Nao het veurlezen kreeg ik een prachtig boeket, gung ik nog even saomen met Bert Rossing en Roelie Koobs (mien redacteur) op de foto en daornao waren de happies en draankies an de beurt. En vanzölf de signeersessie.

Ik daank iederien bezunder hartelijk veur de organisaotie, de metwarking, de komst en het enthousiasme en Heeren Oud-Zuid veur de muzikaole umliesting van dizze mooie middag!

              

De bundel is te koop bij de Drentse boekhandels en vanzölf in de webshop van het Huus van de Taol. Daor kom je aj hier klikt.